Sarangani Province–Gisugdan na karon sa pagtuyok sa mga personahe sa PhilRice kon Philippine Rice Research Institute ang mga kabukiran sa Sarangani Province aron masuta sa siyentipiko nga pamaagi kung unsang mga variety sa upland rice ang anaa nagtubo sa mga Indigenous People IP community sa probinsya.
Segun ni Toto Terando, ang program manager sa Sulong Tribu program, walay lain kining katuyuan kundili nga masuta, ma-preserba, ma-kolekta og mapadaghan pa ang nagkadaiyang variety sa upland nga humay nga anaa sa Sarangani.
Kini nga mga variety sa upland rice sa mga kaigsoonang lumad sa Sarangani ang dakog gikatabang sa rice sufficiency program sa lokal nga panggamhanan tungod kay anaa kini katakos nga mutubo taliwala sa kainit sa panahon ikumpara sa commercial rice nga dili kalahutay sa tumang hulaw.
Hinungdan nga si Governor Steve Chiongbian Solon na mismo ang nagpili nga ang SAAD livelihood program kon Special Area for Agricultural Development sa Department of Agriculture ang magtutok gayud sa upland rice. Atong Nobyembre 29, atol sa IP Day nga kabahin sa selebrasyon sa MunaTo Festival 2018 sa Sarangani Province, laing mga kagamitan pang-uma ang gitunol alang sa mga kahugpungan sa mag-uumang IP nga benipisyaryo sa SAAD nikantidad tanan og P9.5 Milyon ka pesos, gilangkuban sa 18 kabuok rice thresher, 18 ka corn sheller, 7 ka rice mill, 18 ka rice harvester, og 1,300 kabuok knapsack sprayer pang-spray sa gipangtanum.
