TACLOBAN CITY – Ha padayon nga pag aksyon han RMN han delay nga cash grant han mga benipisyaryo han Pantawid Pamilyang Pilipino Program (4PS), gintalinguha namon nga bantaron an DSWD para han update.
Nakipag-sumpayan an RMN Ha Department of Social Welfare and Development (DSWD) Central Office para masayuran an mga benipisyaryo.
Ha txt message nga ginpadara tikang kan DSWD Usec. Camilo Gudmalin, ngatanan nga payrolls han P1, P2 ngan P3 in napirmahan na ngan andam na para madownload an cash grant ha mga accounts han mga benepisyaryo.
Napirmahan na gihapon an Memorandum Of Agreement (MOA) ha butnga han DSWD ngan Philippine Veterans Bank (PVB) pero ginrereview pa yana ini han mao nga bangko.
Dugang ha txt message ni Usec. Gudmalin, nagpatapod an Veterans Bank nga maaprobahan an review yana nga semana.
Naghuhulat nala an DSWD han aprroval ngan pagna-aprobahan na yana nga semana in igda-download dayon an cash grant ngadto ha mga benepisyaryo.
Sanglit, pirmi nga mamati ha 99.1 RMN Tacloban ha iyo mga radyo para han exclusive updates.
