Davao City- Sikop sa San Pedro PNP ang upat ka tawo nga taga Cotabato City nga nasakpang nanguot og cellphone ug uban pang gamit sa Roxas Night Market ning syudad sa Davao.
Giila sa kapulisan ang upat ka mga dinakpan nga sila Ibrahim Mumad, Bai Lyn Mantawil, Zenaida Abdula ug Warda Ali Dok, pulos taga Poblacion, Cotabato City.
Bandang alas 8:30 kagabii, naaktuhan ang upat ka mga suspek nga gikawat ang usa ka Flare CM cellphone nga mukantidad og 6,000 pesos, pitaka, coin purse ug flash drive nga gibutang sa bulsa sa backpack sa biktima nga giilang si James Sandoval.
Samtang nanihapon ang biktima sa nasangpit nga lugar, gikuot sa mga suspek ang mga nasangpit nga gamit apan daling milihok ang kauplisan hinungdan sa pagkasikop niini.
Balhog na sa prisohan ang mga dinakpan ug gi-andam na sa San Pedro PNP ang kasong ipasaka batok kanila.
RadyoMaN Renz Barbarona
