MARAWI CITY — Padayon pa nga ginahibalo sang Armed Forces of the Philippines (AFP) ang tuod nga kahamtangan sang mga babaye nga ginpangdakop sang terorista nga Maute sa Marawo City.
Ini may kaangtanan sa nakuha nga drone video sang pila ka mga babaye nga posible ginpabusong sang mga terorista.
Makit-an sa video ang mga nagadalagan nga mga terorista pabalik sa ila ginatagu-an nga mosque upod ang mga babaye nga naka-itom.
Suno kay WestMinCom spokesperson Capt. Joan Petinglay, posible nga tuod ang balita bangud nakabaton sila sang intelligence report nga ginapang-rape sang terorista ang mga babaye nila nga ginpang-kidnap.
Sa subong, sunod-sunod ang pagpang-bomba sang militar bangud sa posibilidad nga yara pa sa sulod sang Marawi City ang isa sa mga lider sang Maute group nga si Abdullah Maute.
Sa pihak nga bahin, gindeklarar na sang local crisis officials sang Marawi City ang “mental health crisis” sa lugar bangud sa nagasaka nga numero sang mga bakwit nga may mental disorder.
Padayon sa gihapon ang panawagan sang Provincial Crisis Management Committee sa mga ahensiya sang gobyerno nga tutukan man ang mental health sang masobra 30 mil ka mga evacuees bangud sa nakit-an nga sintomas sang grabe nga depression.
———————–
LIKE OUR OFFICIAL FACEBOOK PAGE: www.facebook.com/ifmbacolod943
