Pinaagi sa damgo natultolan sa ig-agaw ang patayng lawas sa usa ka 21 anyos nga ulitawo nga gituohang naghikog sa punoan sa mangga.
Kini ang gibutyag ni PO3 Roldan Sayatao, imbestigador sa Police Station 7 sa Bulua sa interview sa dxCC-RMN.
Matud ni PO3 Sayatao nga ang biktima mao si Reniel Mugot nga nagpuyo sa Purok 2, Zone 6, Barangay Iponan ning syudad.
Base sa imbestigasyon sa kapulisan nga hubog si Mugot sa dihang niuli kagahapong adlawa ug nideretso sa usa ka payag.
Apan sa dihang gisusi sa uyoan niini ang payag kagahapong adlawa wala nila nakita ang biktima nga ila usab nga gikatingala.
Matud ni PO3 Sayatao nga nadamgohan sa iyang ig-agaw nga si Jubert Romo nga tua ang biktima sa punoan sa mangga nga dali usab nilang gisusi kaganihang alas 6:30 sa buntag.
Didto na nakita ni Romo ang iyang ig-agaw nga naglingkod nga dunay hikot sa liog gamit ang liston sa sapatos.
Gidugang ni PO3 Sayatao nga walay nakitang foul play ang kapulisan sa maong insedente.
