Nahimong lugar sa mga debotong Katoliko sa panahon sa Kwaresma ang pinakataas nga bungtod sa Misamis Oriental.
Sa ikatulong tuig, nahimong lugar alang sa mga Katoliko ang Dunque Hill sa Barangay Upper Malubog sa lungsod sa Manticao, alang sa Stations of the Cross.
Adunay gitas-on nga 2,600 feet above sea level, moabot sa halos 30 ka kilometro ang gilay-on niini gikan sa sentro sa lungsod.
Dinhi gipangtukod ang nagkalain-laing tower sa mga telecommunication companies.
Matud pa’ng Rev. Fr. Eleuterio Datoy sa Christ the King sub-parish, mas masinati sa mga parokyano ang sakripisyo sa pagbaktas og unom ka kilometro agi sa batohon, lubak-lubak ug patungas nga dalan.
Kinahanglan pang katkaton ang 200 ngadto na sa 300 metros nga pinaka bungtod sulod sa pito ngadto na sa napulo ka minutos aron makaabot sa katapusang estasyon ug makaapil sa misa sa Biyernes Santo.
Kaniadto, sa sentro sa Tu-od lang magtuyok-tuyok ang mga parokyano alang sa via crucis. Ang uban dili na motapos ug dayung mamauli tungod kay diha raman kini sa atbang sa ilang mga panimalay.
Pangandoy sa LGU nga mahimong tourist attraction ang lugar ug mahimong sentro sa lenten season sa rehiyon ang lungsod pinaagi sa tabang sa simbahan.
