Report ni: Jennifer Palomo Debaja
Isa ka 31 anyos nga Filipina hiker ang ginrescue sang Lunes sang aga matapos ang halos walo ka oras nga nagpabilin ini sa nahulugan nga pil-as sa Ma On Shan sang Domingo Marso 31, 2019.
Naka angkon sang pilas sa kamut, ti-il , guya kag hawak ang pinay apang conscious ini nga gin airlift sang helicopter kag gindala sa Pamela Youde Nethersole Eastern Hospital para sa nagakadapat nga medical treatment.
Nahibaluan nga 6 tanan ka mag abyan nga Pinay kag tatlo ka Indonesians kag naga edad 31 tubtob 44 anyos ang naghiking halin sa Saikung padulong sa Ma On Shan Country Park.
Base sa lokal media report, well equipped sang hiking gears kag may suksok pa nga helmets ang mga ini.
Natabo ang insidente mga takna alas 5:40 Domingo sang hapon sang nakalab-ot na ang grupo sa Ma On Shan sang hinali nga nadulaan sang balanse ang biktima kag disgrasya nga nahulog sa pil-as 20 ka metros ka tapak halin sa iya nahamtangan.
Samtang nagareport sa otoridad kag nagpangayo sang bulig ang kaupdanan sang biktima, duwa ka upod sini ang nagpangita sang paagi nga makapanaog sa nahamtangan sini.
Tungod indi kabisado sang mga hikers ang ila nahamtangan, binudlayan ang mga otoridad kag rescuers sa pagpangita sa ila. Sang nalocate na ang mga ini, kinahanglan gihapon sang rescue equipment, rason nga napilitan ang rescue team magpalipas sang gab-i upod sa biktima.
Takna alas 7: 00 Lunes sang aga ginpatigayon ang pag rescue sa biktima apang nalab-utan sang apat ka oras nga gindala ini sa wayang o open space antis ini nakuha sang helicopter.
Sa pag panikasog sang firefighter team natigayon nga narescue kag nadala naman padulhog ang lima ka kaupdanan sang biktima samtang gin airlift naman ini agud madala sa ospital.
