Report ni: Tita Jen Palomo Debaja
Sa gulpi nga pagkapatay sang Taiwanese nga mister ni Emily nga naga edad sang 65 anyos bangud sang lung cancer, solo sini nga gina atubang subong ang daku nga balayran sa ospital kag ang pag padaku sang ila duwa ka kabataan. Salamat nalang may “Apple Daily Taiwan” nga nagpatigayon agud makatipon sang donasyon para sa pamilya sini.
Nag obra sa Taiwan si Emily bilang factory worker sa isa ka electronic company kag didto man sini nakilala ang iya nangin mister nga isa ka pastor pulo ka tuig ang nagligad.
Tungod gamay lang nga inintsik ang nabal-an sini kag kinahanglan sang iya kabataan ang makaeskwela, dapat man sini nga e enrol sa kindergarten ang iya duwa ka kabataan. Apang magalab-ot sa NT$19,000 ang tuition sang mga ini.
Sa karon, free education na ang ihatag para sa kapid nga kabataan ni Emily.
Suno kay Emily, naga part-time siya sa isa ka fast food shop apang ang NT$10,000 kada bulan tsakto lamang sa pagkaon, renta kag mga bills kada bulan.
Sa kaluoy sang ospital, nag pangako ang ila social worker nga asistiran si Emily sa pag file para mareduce ang balayran sa medical bills sang napatay nga mister. Dugang pa diri ang pag arrange sang application ni Emily para sa low-income family allowance kada bulan nga NT$5,390.
Ginalauman nga ang charity fund sang Taiwan Apple Daily makatandog sa balatyagon sang readers sini kag makabulig tipon sang donasyon para sa pinay kag sa iya 2 ka kabataan.
