Report ni: Jennifer Palomo Debaja
Ginpamatbatan sang 9 ka tuig kag 2 ka bulan nga pagka priso ang isa ka Pinoy seafarer matapos nag aku sa pag smuggle sa Hong Kong sang masobra HK$1.6 million (P10.7 million) nga cocaine.
Sa pahayag ni Justice E. Toh, mapriso kontani sang 23 ka tuig si Carlito Platon, 41 anyos, apang tungod sa iya guilty plea kag pag testify batok sa 2 ka Colombian apisar sa nabaton nga pamahog pati sang iya pamilya sa Pilipinas, ginbuhinan sang 60 porsiyento ang iya sentensiya.
Sa depensa sang abogado ni Platon, nakumbinsi ini nga mangin drugmule bangud naga kinahanglan gid ini sang kwarta para sa medical bills sang iya asawa kag sang 72 anyos nga iloy.
Nahibaluan nga 27 anyos na ini nga naga obra bilang seaman kag nagabaton sang sweldo nga US$1,300.
Sa madumdan, gin arestar ang Pinoy sang Hunyo 2, 2017, isa ka adlaw nga nakadungka ang ginasakyan nga barko sa HK port.
Likum sa ihibalo sang Pinoy, under surveillance na ini sa Custom officers pagdungka palang sang ginasakyan nga barko tungod sa tip off nga may drug shipment halin sa Colombia.
Suno sa Pinoy, isa ka Chinese guy nga naga suksok sang goggles kag helmet ang una sini nga naestorya antis paman nag disembark ang barko kag amuman ang naghatag sa iya sang itom nga plastic bag nga may unod nga illegal drugs antis nag padulong sa hotel.
Samtang yara sa hotel, ginsugat ini sang 2 ka Colombians kag takna alas 3:20 sang hapon sang June 2, nagsakay sila sa taxi padulong sa Jordan. Pagpanaog palang sa taxi may mga custom officers na nga nagahulat sa ila kag gilayon sila gin aresto.
Isa sa mga Colombians ang naghaboy sang plastic bag nga naga unod nga 1.982 kilograms sang cocaine samtang narekuber naman sa backpack sang Pinoy ang cash nga naga balor sang HK$105,100.
Sa ginpatigayon nga laboratory check sang government chemist, nadeterminar nga naga contain sang 1.333 kilos nga cocaine ang ginsmuggle nga druga kag may street value nga wala naganubo sa HK$1,677,754.
