Ginkumpirmar ni Department of Labor and Employment ukon DOLE 12 Regional Director Sisinio Cano nga may isa na ka establishemento (hotel and restaurant) dire sa rehiyon ang nag-adoptar sang flexible working scheme tungod apektado ang ila nga negosyo sang paandam sang coronavirus disease 2019( COVID 19 )
Suno kay RD Cano yara sa 101 ka mga empleyado ang imbolbado sa ginapatuman nga flexible work scheme sang kumpanya.
Base sa ila nga aplikasyon magatrabaho sang apat ka adlaw sa sulod sang isa ka semana ang mga empleyado sini sa sulod sang anum ka bulan halin Pebrero tubtob Agosto subong nga tuig.
Samtang suno kay RD Cano may dapat nga sundon nga polisiya ang mga kumpanya sa tion nga mag-adoptar sang flexible work scheme base sa ginpaggwa nga DOLE advisory no. 4 series of 2020 nga kinahanglan nga konsultahon ang mga empleyado kag may agreement nga amo man suno pa ang ginhimo sang nasambit nga kumpanya.
Pasok naman suno pa sa nasambit nga scheme ang ‘no work, no pay’ policy
Nahibaluan nga una na nga nagpanawagan ang Department of Labor and Employment (DOLE) sa mga pribado nga kompanya nga apektado sang paandam sang coronavirus disease 2019 (Covid-19) nga magpatuman sang‘flexible working scheme’ partikular na sa sektor sang turismo matapos nga may-yara sang report nga linibo ka mga empleyado partikular na sa travel agencies, airline, hotels and restaurants ang naapektuhan sang travel restrictions tungod sa Covid-19 outbreak sa bug-os kalibutan.
