Pipila ka kandidato nakasupak sa campaign policy sa unang adlaw sa kampanya

Davao Ciy- Gibutyag sa Commission on Election Davao region (COMELEC-XI), adunay pipila ka kandidato sa synchronized Barangay ug Sangguniang Kabataan Election (BSKE 2023), ang nakalapas sa unang adlaw sa kampanya kagahapong adlawa.

Sa assessment gisulti ni COMELEC-XI Acting Regional Director Atty.Gay Enumerables, ang bayolasyon nga nahimo sa pipila ka mga kandidato, ang pagbutang og campaign materials nga wala sa designated posters area.

Gitakdang mag-isyu og show cause order si Enumerables batok sa mga kandidato nga nakasupak sa kampanya, kung dili gayod nila tanggalon ang ilang mga campaign materials nga gibutang sa mga lugar nga wala gitugot.

Alayon niini, maglusad usab og “Operation Baklas” ang COMELEC, human sa tulo ka adlaw gikan karon kung walay mahitabo, aron sila na mismo ang manguha sa mga posters nga wala sa mga designated areas. Walay limitasyon sa oras ang pagpangampanya, basta dili lang makatugaw sa ubang mga residente.

Gidasig pa sa Acting Regional Director, ang tanang magpapili nga sundon ang tanang reglamentos nga gihatag sa ilang buhatan, aron mahimong hapsay ug malinawon ang kampanya nga matapus sa Oktubre 28, 2023.

RadyoMaN Joel Viray