Pipila ka lugar sa Bukidnon, nagkansela na sa klase tungod sa Baygong Basyang

37

Bukidnon – Suspendido na ang klase sa mga tulunghaan sa probinsya sa Bukidnon tungod sa bagyong Basyang.

Sa dakbayan sa Malaybalay, nagpagawas ug executive order no. 7 si City Administrator Herculano Ronolo, ang officer-in-charge sa siyudad nga nagsuspendi sa klase sa pre-school, elementary ug high school sa tanang pribado ug pampublikong tulunghaan sa siyudad karong adlawa.

Sa Valencia City, nagpakanaug usab ug usa ka memorandum order no. 42 ang City Administator nga nagkansela sa klase gikan sa pre-school hangtod sa sekondarya sa pribado ug pampublikong tulunghaan sa siyudad karong adlawa, Martes.

Kini aron mahatagan ug prayoridad ang kaluwasan sa mga estudyante.

Samtang gisiguro usab sa buhatan nga nakamonitor sila pag-ayo sa dagan ug posibleng epekto sa bagyong Basyang.

Gipahinumduman usab sa Valencia City-LGU ang publiko nga magma-ampingon ug mo-contact sa buhatan sa CDRRMC pinaagi sa cellphone number 09055940094 kung adunay emerhensiya.

Samtang nagpagawas usab ug kamanduan si San Fernando Mayor Levi Edma nga nag-suspendi sa klase sa tanang level sa mao nga lungsod karong adlawa.

Sa lungsod sa Lantapan usab, deklarado na sa Officer-In-Charge, Sulpicio D. Gallano, Jr. nga walay klase karong gumikan kini sa nasinatiang pag-ulan bunga ning Bagyong Basyang (Sanba).

Atol sa gihimong panagtigum, gideklarang walay klase gikan sa Elementarya hangtod na sa Sekondarya. Preparado na usab ang buhatan sa DRRMC alang sa maidulot nga pag-agi unya ni Basyang sa Lungsod sa Lantapan.

Gani nag-abeso na ang lungsod sa mga Barangay nga nakitang adunay Calamity Prone Areas aron mapahimangnuan ang mga nanimuyo duol dinhi.

Una nang gipamahayag sa PDRRMC Bukidnon nga naka-full alert na ang mga emergency response units sa probinsya isip pagpangandam sa bagyong Basyang.

Naka standby na usab ang ilang mga gingsakpan isip pagpangandam sa posibleng pagbaha ilabina na sa mga flood-prone na mga barangay.

Alayon niini nagpahimangno ang PDRRMC sa publiko nga mahimong alerto ilabina kadtong mga nagpuyo sa mga low lying areas, mga flashflood ug landslide prone areas.

Facebook Comments