Pipila ka menor de edad lakip an hingkod an pangidaron an tagsita sa ikatuyo ka adlaw na implementasyon sa General Curfew sa Surigao City
Sumaya pa ni Police Senior Inspector Dorothy Tumulak, an nanguyo sa Public Community Relations sa City PNP, kagabii atol sa ikatuyo ka adlaw na implementasyon an mga nasita nila naglangkob sa 10 ka mga menor de edad, 4 an hingkod an pangidaron ug 2 ka motorsiklo an tag-impound resulta sa pipila ka nakit-an na traffic violations.
Tagtudlo na human an pagsugod sa implementasyon sa General Curfew adton Enero 8, nabantayan nila na nomenos an mga naglatagaw na mga kabataan ug hingkod an pangidaron sa nag-unang kadayanan. Gani sa mga waya pa mahibayo sa General Curfew na magsugod alas 12:00 sa tungang gabii hangtud alas 4L00 sa kaadlawon an ila tanan tagpasabot sa sitwasyon na ini na mga lakang para sa seguridad ra sa kinatibuk-an.
Sa tigom isab kahapon nan Association of Brgy. Captains nan Surigao City, tagpasabot ni Senior Inspector Tumulak an pagpatuman sa curfew lakip an pag-awhag sa tabang nan mga barangay officials ug mga tanod sa taghimo na mga pagsita ug pagpandakop sa mga nakalapas. Tagpadayag na dili mahadlok an katawhan sa curfew kay ila tagpatuman an pagrespeto sa tawhanong katungod ug an rule of law.
Sa habig nan ABC President na si Pablo Bonono Jr. tag-angkon niini na may lahi-lahi na reaksiyon ug opinion an tagpaabot human tagpatuman an General Curfew pero para sa ila mga Kapitanes mas pabor sila sa amo na lakang kay gani sa Brgy. Taft, dako an nahimo na kaisaban medyo nolinaw an palibot, nawaya an mga tapok-tapok sa mga kabataan ug mga latagaw. Sila lakip an mga ginikanan an nagpasalamat sa amo na curfew, dili isab mahadlok an mga Surigaonon kay an ija nakit-an na importante dad-on gajud an mga ID para kon masita sa kadayanan an dali an verification na himoon.
