General Santos City–Mukabat matud pa sa sobra napulo ka mga bangkang panagatan ang nanga-unlod sa Maasim Sarangani Province human nga mihapak ang dagkong balod tungod sa kusog nga hangin nga dala ni bagyong Marilyn.
Sumala pa ni Rey Publite, Rescuer sa Maasim Disaster Risk Reduction Office nga anaa sa pito ka mga mananagat ang ilahang na rescue tungod kay natrap sa ilahang mga nangaunlod nga Bangka.
Dugang pa niini nga gabie palang niadtong Hwebes nakaalerto na ang mga rescuer sa Maasim MDRRMO tungod kay nagsugod na ang paghapak sa mga balod sa baybayon nga bahin sa Maasim kung diin daghang mga Bangka ang gipang-angkla.
Sa karon wala paman usab nakuha sa mga rescuer ang tanang pangalan sa mga biktima ug ginasuta pa ang kinatibuk-ang damyos sa mga nangaguba nga Bangka.
Samtang basi usab sa usa ka Mariam Bughaw nga nasayud na silang daan nga adunay bagyo nga nakasulod sa Pilipinas hinungdan nga wala na nila gipalawod ang ilahang mga sakayan apan dili na matud pa moandar ang makina sa iyahang sakayan hinungdan nga wala nila nadala sa tinoto, Maasim aron nga didto e-angkla.
Dugang pa ni Mariam nga dagko matud pa kaayo nga balod ang mi-igo ngadto sa ilahang mga sakyanan nga hapit usab mibanlas sa pipila ka mga panimalay nga naa nahimutang daplin sa baybayon.
Nanawagan nalang kini ug tabang ngadto sa lokal nga panggamhanan nga sila matabangan tungod sa pagkaguba sa ilang mga bangka tungod kay mao lang kini ang ilahang panginabuhian. (Dave Silagan)
