Nagbaton matud pa karon ug daghang kaso sa tipdas ang duha ka mga lungsod ning lalawigan sa Zamboanga del Norte nga mao ang Gutalac ug Labason.
Apan sa gihimong ligtas tigdas media forum niadtong Martes sa Mibang Hotel ning syudad, gibutyag sa mga opisyal sa provincial health office sa pagpanguna ni Dr. Eduardo Luayon, ang provincial health officer sa lalawigan, nga ang mga kaso nga natala sa maong mga lungsod dili pa kompirmado nga kini tipdas hangtud nga wala pay kompirmasyon nga nadawat ang ilang buhatan nga magpamatuuod nga kini tipdas.
Sa pagkakaron, gihulat pa sa buhatan sa provincial health office ang resulta sa eksaminasyon sa dugo sa mga pasyente nga nagbaton ug sintomas sa maong sakit.
Sa pinakaulahing datus nga gipakita sa mga opisyal sa PHO atol sa maong forum, ang mga lungsod ning lalawigan nga nagbaton sa confirmed cases sa tipdas sa bulan sa Abril mao ang Labason nga nagbaton ug 3, Liloy 2, Leon B. Postigo 2, Siocon 1, Gutalac 2, Sindangan 1, ug Siayan nga adunay 2 ka kaso.
Kalabot niini, gi-awhag sa mga opisyal sa PHO ang mga ginikanan nga adunay mga bata nga nag-edad 6-59 ka bulan nga pabakunahan ang mga bata aron makalikay sa maong sakit nga kung mapasagdan pwedeng makamatay.
Niadtong Mayo 9, gisugdan na sa City Health Office Dipolog ang Ligtas Tigdas Door-to-Door Supplemental Immunization Activity sa tanang mga kabaranggayan nga sakop ning syudad.
