Nagsugod na sa pagpamakwit niadtong nakalabay’ng adlaw ang kapin napulo ka mga pamilya gikan sa Lanao del Norte paingun ngadto sa silingang probinsiya sa Misamis Occidental ug siyudad sa Ozamiz.
Kini tungod sa kahadlok nga resulta sa mga pagpanghulga nga mikalat sa text message ug sa social media nga aduna matud pay pag-atake sa ilang mga lugar, alayon sa pagpahigayon og plebisito sa Lanao del Norte ugma.
Matud pa ni Chief Inspector Salman Saad, information officer ug community relations chief sa Lanao del Norte Provincial Police Office, ilaha nang gi-beripika ang nasangpit nga mga pamilya kung asa kini nanglarga.
Gikan matud pa ang maong mga pamilya sa mga lungsod sa Sultan Naga Dimaporo, Kolambogan ug Lala.
Apan miingon si Saad, nga mibisita lamang kini sa ilang mga kabanay.
Subling gisiguro sa Philippine National Police nga walay angayang kahadlokan ang mga residente tungod kay walay problema ang peace and order sa Lanao del Norte.
