Davao City – Segurohon nga andam ug magamit ang mga pampublikong tunghaan pagsugod sa school year 2018-2019.
Kini maoy gibutyag ni Human Resource Management Office (HRMO) chief Erwin Alparaque atol sa gipahigayong presser kinsa usab mibutyag nga mao kini ang mandato ni Davao City Mayor Sara Duterte-Carpio.
Sumala niini, aduna na silay na-identipika nga 65 ka mga skilled workers gikan sa managlahing ahensiya sama City Engineers Office, City Economic Enterprise, General Services Office, City Mayors Office, ug Human Resource Management Office.
Gisaysay ni Alparaque nga ang nasangpit nga skilled workers mao ang mga karpintero, painters, plumbers, mason ug electricians.
Dugang ni Alparaque nga nagsugod na og repair ang maong mga skilled workers ngadto sa mga tulunghaan sa Toril, Talomo, Tugbok, Poblacion, Agdao ug Buhangin diin ginalauman kining mahuman karong adlaw’ng Sabado.
Sa pikas bahin, mandato usab sa atong mayor matud pa nga magdeploy og tagsa-tagsa ka mga security guards pinaagi sa Public Safety and Security Command Center (PSSCC) karong umaabot nga klase sa parehong elementarya ug sekondarya alang sa seguridad sa mga estudyante ingon man ang tulunghaan sa mga dautang lihok.
RadyoMaN Jason Amisola
