General Santos City–Ubay-ubay nga mga indibidwal ang nahidangat sa buhatan sa city treasurer’s office aron nga ibalik ang ilahang nadawat nga P5,000.00 nga ayuda gikan sa gobyerno ilawom sa Social Amelioration Program sa DSWD.
Pareho ang nahimong rason sa mga nasampit sa ilang pag-uli sa maong kwarta ug mao kini ang rason nga dili sila kwalipikado tungod aduna silay pension samtang ang uban adunay asawa o bana nga nagtrabaho sa buhatan sa gobyerno.
Si nanay Melita ug tatay Nonito usa sa mga niuli sa nadawat nga pinansyal nga ayuda nagbutyag nga ila nalang gibalik ang kwarta aron nga dili na sila magka-problema pag-abot sa panahon. Bisan matud pa ug mapadulong sa ilang kaunon ang maong kwarta aduna pay mas nanginahanglan niini hinungdan nga ila nalang gi-uli sa city treasurer’s office.
Mapasalamaton usab ang labaw sa CSWD-Gensan nga si Rebeca Magante sa katawhang matinud-anon nga mi-uli sa kwarta tungod kay nasayod sila nga dili sila kwalipekado ug posibleng mamahimo nga mapasakaan ug kaso tungod niini.
Samtang Hugot usab nga gipanghimakak ni Magante nga ang 2015 city census ang ilang gigamit sa profiling sa mga benipersyaryo, sanglit mao matud pa kini ang ilang gihimong basihan sa posibleng mga binipesyaryo.
Gi-angkon usab niini nga adunay gyu’y mga sipyat nga nahitabo tungod aduna matud pay mga form nga dili mismo ang benipesyaryo ang nagbutang sa impormasyon.(CDS)
