Dakpan ang pito ka mga armed members sang Bangsamoro Islamic Freedom Fighters ukon BIFF sa Sitio Barugot, Barangay Mother Tuayan, Datu Hoffer, Maguindanao sang tinalikdan nga adlaw sa ginpatigayon nga operasyon sang militar.
Ginpahayag ni Lt. Gen. Corleto Vinluan, Jr., Commander sang Western Mindanao Command nga samtang nagapatigayon sang combat clearing operation ang tropa sang 40th Infantry Battalion sa nasambit nga lugar nadakpan ang pito ka mga armed personalities nga nagpakilala nga miyembro san 105th Base Command sang Bangsamoro Islamic Armed Forces.
Samtang sang pangayuan sang anuman nga pamatuod nga lehitimo nga miyembro sang nasambit nga grupo, napaslawan ang mga ini nga magpakita rason nga gin-aresto ang mga ini kag ginkumpiskar ang ila bitbit nga armas luthang kag iban pa nga mga war materials kag gindala sa Maguindanao PNP para sa nagakaigo nga disposisyon.
Suno kay 40th IB Commanding Officer Lt. Col. Rogelio Gabi nakumpiskar sang tropa ang duha ka M1 Garand rifles, 1 ka M14 rifle, 1 ka M4, kag iban pa nga mga war materials.
May-angot sini, suno kay 1st Mechanized Infantry Brigade Officer-in-Charge Col. Ferdinand Lacadin ginmanduan niya ang 40th IB kag 1st Mechanized Battalion nga ipadayon ang pagpatigayon sang combat clearing operations sa nasambit nga lugar sa posible pagneutralize sang madamo pa nga BIFF militants.
Gincommend naman ni Joint Task Force Central Commander Maj. Gen. Juvymax Uy ang operating troops sa determinasyon nga mapabilin ang katawhayan sa central Mindanao.
credit: Westmincom
