Nagpakanaug ug resolusyon ang Sangguniang Panlalawigan ning probinsya sa Bukidnon nga maghangyo nga dili dayunon ang plano sa Department of Health ug Department of Interior and Local Government kon DILG nga himoong nCoV quarantine o isolation site ang Northern Mindanao Wellness and Reintegration Center kon NMWRC nga nahimutang Casisang, Malaybalay City.
Sa interview sa RMN Malaybalay ngadto kang Bukidnon Provincial Administrator Atty. Jay Albarece gibutyag niini nga nahisgutan sa ilang gihimong panagtigum dili pa lamang dugay ang pagtawag sa DOH ug DILG ngadto kang Governor Jose Maria R. Zubiri Jr. nga himooong isolation area ang pinakadakong drug rehabilitation center sa Mindanao.
Matud ni Atty. Albarece nga nasabutan sa ilang gihimong meeting nga magpakanaug ug resolution nga kung mahimo dili dayunon ang mao nga plano tungod kay nahimutang kini sa pinaka-uyukan sa Bukidnon ug nahimutang usab kini sa highly populated sa siyudad sa Malaybalay.
Hinoon giklaro Atty. Albarece nga wala nila balibari ang mao nga plano tungod kay responsibilidad usab sa probinsya nga mutuman sa lakang nga himoon sa DOH apan gihangyo lamang nga mas maayong mangita na lang ug usa ka lugar nga conducive sa mao nga plano.
Sigun niya nga adunay resolution ang SP Bukidnon ug Mayors League mahitungod sa mao nga plano nga ipaabot sa DOH ug DILG kalabot sa hinanaing sa probinsya.
