Ikinagalak ng pamunuan ng Philippine Coast Guard (PCG) ang mungkahi ni Senator Richard Gordon na dagdagan ang kanilang pondo para higit na mapahusay ang kapabilidad ng ahensiya.
Ayon kay PCG spokesman Captain Armand Balilo, malaking tulong ang naturang plano ng senador dahil marami pang buhay aniya ang maliligtas kapag tuluyan ng madagdagan ang kanilang budget.
Mungkahi kasi ni Gordon na dagdagan ang budget ng PCG, matapos ang pagbangga ng isang Chinese vessel sa bangkang sinasakyan ng mga Pilipinong mangingisda sa Recto Bank.
Paliwanag ni Balilo, mahalaga na lalong mapalakas at mabigyan pa ng sapat na mga kagamitan ang Philippine Coast Guard (PCG), upang magamit sakaling mayroong hindi inaasahang sakuna sa karagatan gaya ng nangyari sa mga mangingisdang Pilipino na nalalagay sa panganib sa Recto Bank.
Giit ni Balilo kung mayroong sapat na mga kagamitan ang PCG hindi na mahihirapan na magsagawa ng mga rescue operation gaya ng kahalintulad na insidente sa Recto Bank kung saan nalalagay sa balag ng alanganin ang mangingisdang Pinoy.
