Ya sale sobre-saltao el cuantos residentes del Talisayan enantes madrogada despues el cuantos tanque del acetylene y oxygen ya rebenta y ya arde na un porcion na compound del Prycegas na Talisayan.
Base na report del bumbero y del pulis banda alas 2:45 del aga cuando ya arde y ya rebenta el cuantos tanque que ya causa para asusta el cuantos quien ta queda serca na lugar.
Dayun ya sale reportao el incidente na bumbero y ya responde maga truck de agua y ya precura afasigua con el fuego de no mas man calayat na otro porcion del planta.
Alas 3:30 ya del aga cuando ya puede conrola con el fuego y ya declara fire-out el maga del bumbero.
Asegun na imbestigacion del bumbero y del pulis, possible ya tene faulty wiring desde na electric post y atiempo tiene leaking desde nma cuantos tanque que ya causa para arde y ya rebenta el cuantos tangque.
Nohay tambien quien ya sinti duele durante el incidente.
