RMN Laoag – Naiget a banbantayan ti pulisya ti pamasahe dagiti pampasahero a tricycle iti siudad ti Laoag, kabayatan ti Region 1 Athletic Association meet iti probinsya ti Ilocos Norte.
Daytoy ti impalgak ni Police Supt. Reynante Baltazar, Deputy Provincial Director for Operations iti Ilocos Norte Police Office. Kinunana, siguradoen ti kapulisan ti seguridad dagiti bisita bayat ti nasao nga ay-ayam.
Innayun pay ni Baltazar nga adda dagiti concerned citizens iti siudad a nangipadanun ti impormasyon nga agpanpanayon ti plete dagiti tricycle drivers uray kasano ti kaadayo ti biaheda.
Adda met dagiti surveillance personnel a nakapwesto iti nagduduma a suli ti siudad ti agdama tapno matutokan ti nadakamat a parikot.
Kabayatanna, nakikoordinar ti PNP Ilocos Norte iti Laoag City police nangnangruna iti traffic division, mainaig iti daytoy.
Malagip nga adda ti ordinansa ti siudad maipanggep kadaytoy, a nu siasinoman ti aglabsing ti ‘traffic code’ ket mabalin nga agmulta ken posible a ma-revoke wenu maikkat ti ‘franchise-to-operate’ ti driver ken operators.
Bernard Ver, RMN News
