Nanawagan karon ang Provincial Local Government Unit (PLGU) sa Sarangani Province hilabi na ang Serbisyong Sarangan Community Outreach Program ilalum sa opisina ni Governor Steve Chiongbian Solon nga subling pahimuslan sa mga katawhan dili lang mga taga-Sarangani kundili sa mga kasikbit lugar sa Rehiyon Dose ang libre nga hearing mission aron kadtong may problema sa pandungog ang ma-remedyuhan pinaagi sa ipanghatag nga mga hearing aid imported pa gikan sa dugay ng partner sa PLGU Sarangani ang Starkey Hearing Foundation naka-basi sa nasud Amerika.
Mahitabo ang Grand Hearing Mission karong bulan sa Nobyembre apan karong adlaw nga Lunes matigayon ang prescreening aron mahiling ng daan ang mga dalunggan ug masukdan alang sa ipanghatag nga libreng hearing devices sa Nobyembre. Mahitabo ang prescreening sulod mismo sa dugay na usab nga partner sa probinsya sa Sarangani sa pagpahigayon og hearing mission ug uban pang community health outreach nga mao ang General Santos Doctors Hospital karon ng Lunes, Oktubre 21 gikan alas otso sa buntag paingon alas dos sa hapon (8am-2pm), sa atrium area sa mao nga inila nga pribadong hospital.
Segun ni Ms. Asma Akmad, ang program manager sa Serbisyong Sarangan Community Outreach ilalum sa Sulong Kalusugan program ni Governor Solon sa pagsuporta nila Senador Manny ug Congressman Ruel Pacquiao, Vice Governor Elmer De Peralta ug tanang board member, abli kini matud pa sa tanan ma-bata man o tigulang sa entiro Region 12 nga adunay suliran sa pandungog, sa pakig-alayon sa LGU Gensan ug PLGU South Cotabato.
Libre ang konsultasyon ug libre ang hearing aid nga kung paliton sa gawas ang mukantidad pud kini og Baynte mil ka pesos (P20K) matag usa.
Dungag good news tungod kay karong Nobyembre, magbutang og usa ka room ang Starkey Hearing Foundation sulod sa Sarangani Provincial Hospital aron muhatag og “aftercare services.” Buot pasabot, dili na muadto sa bisan asa kung magpa-check sa mga hearing aid inig human sa hearing mission kundili adtuan lang ang Sarangani Provincial Hospital tungod kay adunay mga personahe nga muatiman sa pag-repair niini anytime. Lifetime ang pag-suplay libre sa mga battery.
Sa tibuok Pilipinas, Sarangani Province pa lang ang gipili sa founder sa Starkey Hearing Foundation nga butangan sa ilang aftercare service center tungod na usab kay nakadayig sila sa pagdumala. Ang founder sa Starkey Hearing Foundation mao mismo ang adunahan nga mag-asawang Amerikano nga sila Bill ug Tani Austin. Sila ang tag-iya sa nag-inusara nga American-owned and operated global hearing aid manufacturer nga Starkey Hearing Technologies nagsugod ato pang1960s didto sa Amerika.
Nagkahimamat na sila Governor Solon ug ang mag-asawang Austin atong tuig 2013 sa ilang pagbisita sa Sarangani Province ug Gensan atol sa pagpahigayon nila og pasiuna nga mga hearing mission, sa pag-ayuda sa mag-asawang Senador Manny ug former vice governor Jinkee Pacquiao. Kauban pa nila kaniadto sa pag-adto dinhi ang sikat nga Fil-Am singer-song writer nga nailhan tungod sa iyang performance sa American Idol nga si Ms. Jessica Sanchez.
Anaa sa traynta (30) kabuok personahe, sponsors ug volunteers sa Starkey Hearing Foundation gikan sa abroad ang lauman nga mahidangat sa atong lugar karong Nobyembre, apil na matud pa muuban ang mag-asawang Austin.
