Davao City – Gikalipay sa usa ka mental health organization ang response sa magtutudlo, ginikanan, ug counselors nga gusto mahibalo og unsaon pagsabot sa kabatan-unan karong panahona.
Sa pakighinabi sa DXDC RMN Davao kay PMHA-Davao chapter Executive Manager Precious Manliguez, gibutyag niini nga nahimong abri ang mga hamtong karon sa pagsabot sa generation Z (nag edad 16-22 years old) nga matud pa maoy sagad makasinati og sintomas sa depression.
Nasayran nga ang nasangpit nga henerasyon di ganahan makigstorya sa pamilya inay sa social media pirmi mag atubang.
Busa giawhag karon sa PMHA-Davao chapter ang mga ginikanan nga kumustahon ang matag-usa ilabi na ang mga anak ug angay nga hisgutan usab ang kapakyasan sa bisan asang estado aron kini matabangan o maabisuhan og unsay angay buhaton.
“Naay uban family nga dili open to talk about failure sa balay, ang gusto madungog katong maayong gipamuhat sa mga anak,”.
Dugang pa nga padayon usab nilang ginalusad ang parenting alang usab sa mga bata nga makaangkon og maayong pamatasan ug ubang values sa balay pa lang daan ug aron usab masayod ug kabalo mudala panahon nga makasinati og emotional instability.
Subay niini, target karon sa PMHA-Davao chapter nga makatala og 10,000 individuals nga mahatagan og mental health lecture diin ila usab gikalipay nga nagkataas ang ihap sa katawhan nga interesado mahibalo niini itandi niadtong milabayang katuigan nga dunay 1,200 lamang ug 7,000 niadtong tuig 2018.
RadyoMaN Renz Barbarona
