Hugot ang pahimangno sa Police Regional Office 10 sa mga pulis nga padayon nga nalambigit sa nagkadaiyang binuang sa ilang pagtrabaho.
Sa interview sa RMN DXMB Malaybalay ngadto kang PNP 10 Regional Spokesperson Supt. Surkie Sereñas, gibutyag niini nga daghan nang pulis sa rehiyon nga iyang kauban ang nadismiss na sa serbisyo tungod sa internal cleansing program sa organisasyon sa PNP.
Matud ni Sereñas nga dili sila ma-anugon sa mga badlungong pulis nga tangtangon ilabipa ug dinaghan na ang ilang gina-recruit gani dili pa lamang dugay mukabat sa 800 ang mga bag-ong pulis ang ilang gi-recruit.
Nagpadungog-dungog usab kini nga kung aduna may 800 ka pulis ang badlungon kaya kining mapulihan.
Dili pa lamang dugay mukabat sa 18 ka pulis ang nadismiss sa serbisyo sa rehiyon tungod sa nagkadaiyang kasong gi-atubang.
Giklaro usab sa PNP 10 nga walay naglihok nga “sex-for-freedom scheme” sa sa rehiyon.
Reaksiyon kini ni Sereñas human sa taho sa matud pa pagpanglugos sa usa ka Pulis Maynila sa 15 anyos nga dalagita hulip sa kagawasan sa amahan nga nadakapan tungod sa iligal nga droga.
Hinoon gisuguro sa opisyal nga kung aduna man, dili usab nila kini e-tolerate.
