PNP Director-General Oscar Albayalde nagpahigayon karon sa news briefing kalabutan sa mga latest police anti-crime operations sa nasud ug sa resulta sa maong mga operasyon.
Gawas sa kampanya kontra mga drug personalities, gitutukan usab karon sa nasudnong kapulisan ang kalambigitan mismo sa mga salawayong pulis kun mga police scalawags ubos sa nagpadayong internal cleansing sa PNP.
Matud ni Albayalde, niabot sa 46% ang pagkanaug karon sa ‘crimes against property’ bunga sa intensified campaign sa national police force.
“We attribute this to our war on drugs,” dugang sa hepe sa PNP kinsa nagtoo nga ang mga dinakpan sa droga kasagaran nagahimo usab sa uban pang dagkung krimen sama sa ‘Akyat-Bahay’ ug uban pa.
“We will have a new round of validation and we will come up with a new (drug) list,” matud ni Albayalde.
Sa kasong giatubang sa pipila ka mga kanhi magbabalaud sa militant sector kinsa gipangita na sa kapulisan, gipasalig ni Albayalde nga tahuron sa mga awtoridad ang ilang mga katungod nga protektado sa balaud.
Malaumon usab si Albayalde nga daku ug ikatabang ang National ID System diha sa pangkinatibuk-ang kampanya kontra kriminalidad.
“We enjoin, encourage everyone (to support the system),” panapos sa hepe sa PNP.
RadyoMaN June Duterte
