Gialerto usab ang mga police station sa habagatang bahin sa Lalawigan sa Sugbu tungod sa way hunong nga mga pag-uwan , epekto ni bagyong Basyang .
Gipanglantawan nga moagi sa pinakatumoy nga bahin sa Southern Cebu karong gabii ang bagyo sa di pa kini motadlas paingon sa Palawan .
Ang hepe sa Regional Operations and Plans Division sa Police Regional Office-7 nga si Sr. Supt. Julian Entoma nibutyag giandam nila ang ilang search and rescue units aron makatabang dayon panahon sa emerhensiya ug susama niini nga operasyon.
Sa pipila ka bahin sa Southern Cebu adunay pipila ka mga karsada nga nangliki ug nihulpa tungod sa taud-taud na nga pag uwan .
Sa lungsod sa Alegria adunay 64 ka mga pamilya nga gipabakwit sa usa ka gym ug eskuwelahan ug 6 ka pamilya sa Boljoon ang gipabalhin sa mas luwas nga lugar tungod sa way hunung nga pag uwan.
