Gihagit sa Bukidnon Provincial Police Office ang mga mulingkod sa bag-ong han-ay sa mga barangay officials sa probinsya nga mulihok sa kampanya kontra illegal nga droga.
Subay sa balaod nga karong Hunyo 30, sa udto, mulingkod ang mga bag-ong napiling opisyal sa barangay.
Sa interview sa RMN Malaybalay ngadto kang PSI Jiselle Longakit, ang spokesperson sa PNP Provincial Command gibutyag niini nga anagayang mas pahugtan pa ang suporta ug kampanya sa mga barangay opisyal batok sa illegal nga droga.
Gipasabot sa opisyal nga usa kini sa mga prayoridad sa administrasyong Duterte ug sa Philippine National Police maong angayang paluyuhan sa mga opisyal sa barangay.
Nanghinaut usab si Longakit nga walay mga bag-ong napiling opisyales nga nalambigit sa illegal nga droga.
Nagpahimangno usab kini sa mga opisyal nga kung adunay malambigit niini masayran kini nila sa dili madugay ug gipaniguro nga dili i-tolerate sa PNP ug DILG ang dautang binuhatan.
