General santos City–Gilayong nag patawag ug command conference si Police Chief Director General Oscar albayalde sa mga pulis sa Isulan, Sultan Kudarat dungan sa paghidangat niini sa maong lugar tungod sa nahitabong pagpamomba nga gikamatay sa tulo ka tawo ug gikaangol sa lain pang 36 ka biktima niadtong milabay nga gabie.
Sumala pa ni Isulan Mayor Marites Pallasigue nga gisuta sa labaw sa nasudnong kapulisan ang security plan sa Isulan Municipal Police Station aron nga masayran kung aduna bay kakulangon ang gilatag nga siguridad nganong nahitabo ang pagpamomba.
Sumala sa mayor nga wala may nakit-ang kakulangon sa security plan sa kapulisan ug aduna lang gayud matud pay mga panghitabo nga dili kapugngan bisan unsa pa kahugot ang siguridad nga gipatuman.
Human sa maong panagpulong gilayon usab nga mibisita si Albayalde sa mga nasamdan sa maong pagpamomba aron kumustahon ang mga nasangpit.
Samtang gikabutyag man usab ni Mayor Pallasigue nga wala man nahinayon si presidente Rodrigo Duterte sa iyahang planong pagbisita sa lungsud aron nga personal nga makita ang mga nabiktima sa maong pagpamomba. (Dave Silagan)
