Davao City – Susama sa nilabay’ng kapaskuhan, hugot gihapon ang security operations nga gilusad sa atong mga awtoridad aron mentenahon ang hingpit nga kahusay ug kalinaw sa atong dakbayan ug entero rehiyon.
Sumala ni spokesperson Police Chief Insp. Andrea dela Cerna sa Police Regional Office (PRO-XI) sa programang ‘Straight to the Point’, ipatuman sa gihapon nila ang ‘24/7 police visibility’ ug presensya sa nagkadaiyang mga lugar sama sa mga simbahan, malls, resorts ug uban pa diin tapukanan sa mga tawo.
Nakig-koordinar usab ang kapulisan ngadto sa mga Local Government Units (LGUs) ug sa tanang mga ‘force multipliers’ alang sa mas kusog nga pwersa sa pagbantay sa mga kalihukan sa mga kadudahang tawo diha sa mga pampublikong lugar, dugang ni dela Cerna.
“Public safety is everyone’s responsibility,” segun sa tigpamaba sa PRO-XI.
Nanghinaut si Dela Cerna nga ang katawhan mamahimong kanunay magmaigmaton ug gilayon i-report sa pinakaduol nga police assistance desks ang mga mamatikdang dautang binuhatan o kalihukan.
Gipahinumdoman usab sa tigpamaba ang mga Dabawenyo nga likayang magpabuto’g armas gumikan posibleng makadamay kini sa mga inosenteng igo lamang nagselebrar sa kapaskohan.
RadyoMaN Jason Amisola
