RMN Laoag — Inreklamo ni Police Major Alan Emerson D. Daus, hepe ti PNP Batac City iti Sanguniang Panlalawigan ni Konsehala Mary Coleen Colombia Cajigal y Lumang gapu iti inaramidna kadagiti kameng ti PNP iti nasao a siudad.
Naawat ni Bise-Gobernador Angelo Marcos Barba ti ‘verified complaint’ manipud kenni Police Major Daus, nailanad iti reklamona kontra kenni konsehal Cajigal a saan a panangikankano kadagiti kameng ti PNP nga adda iti check point.
Ti surat ni Daus ket naipaima iti committee on laws nga idadauluan ni Bokal Da Vinci Crisostomo tapno naan-anay a maaktoaran ken maadal a naimbag no umno met laeng ti reklamo wenno saan.
Nupay kasta, nasuspenso amin a maisayangkat a hearing gapu pay laeng ta ‘election period’, ngem, kalpasanton ti panagbubutos ket mabalinto a matratar daytoy.
Malagip babaen iti impalgak ni Daus, saan nga inkaskaso ni Konsehala Coleen Cajigal dagiti kameng ti PNP a manarimaan nga agcheck-check point iti national highway bayat a limmabas daytoy ken dagus a pinatarayna ti luganna isu a kinamat isuna dagiti kameng ti PNP.
Kabayatanna, nadismiss ti kaso nga impila ti PNP kontra kenni Cajigal iti opisina ti fiscalia iti nasao a siudad mainaig ti panaglabsing ti Art. 151 iti Revised Penal Code wenno ‘Resistance and disobedience to a person in authority or the agents of such person.’
Bernard Ver, RMN News
