Davao City – Gitino karon ni Philippine National Police (PNP) Spokesperson Chief Supt. Dionardo Carlos nga ang gubat kontra iligal nga droga sa nasud dili kini iya lamang sa kun kinsa ang naglingkod sa palasyo sa Malacañang.
Sa programang ‘Straight to the Point’ sa RMN DXDC Davao, gisugilon ni Carlos nga ang mandato sa nasudnong kapulisan mao ang pagtapos sa iligal nga droga kutob sa makaya niini nga wala magdepende sa deadline kun limitasyon sa panahon.
Segun sa tigpamaba sa PNP, hugot gihapon nilang gipatuman ang kampanya pinasikad sa talaan sa mga tawong giilang nagdula sa nasangpit nga matang sa iligal nga kalihukan.
Sa pangutana nga mismong si Pres. Rodrigo Duterte ni-angkon na nga dili niya makaya pagtapos sa illegal drugs sulod lamang sa iyang unom ka tuig nga termino, gisugilon ni Carlos nga nagpasabot lamang kini kun unsa kadaku ang suliran hinungdan nga inay ma-divert kita sa usaka ‘self-imposed deadline’ ni bisan kinsa, mas angayang tutukan nato sa kun unsay mamahimong atong tabang kun kontribusyon diha sa krusadang naghulga kanatong tanan.
Kahinumdoman nga sa usa niya ka diskurso, gi-angkon sa pamuno-nasud nga sama sa ubang nagprogresong kanasuran sa kalibutan, malisud ang hingpit nga pagpahunong niini sanglit malisud kini nga hagit sa atong nasudnong katakos.
Ubos sa war on drugs sa Duterte administration, liboan na ang nanurender nga mga drug reformists, ubay-ubay na usab ang nitikangkang gumikan nisukol sa mga awtoridad mientras daghan nang mga dagkung drug personalities nagtingkagol na karon sa New Bilibid Prisons sa Muntinlupa ug sa uban pang mga detention facilities lakip na ang nag-unang kritiko sa administrasyon nga si Sen. Leila Delima.
Kasamang June Duterte
