Hingpit na nga napaubos sa inquest proceedings sa piskaliya, si David Lim Jr., kinsa maoy suspek sa pagpusil sa nurse nga si Ephraim Montalbo, subay sa nahitabong road rage sa brgy. Kamputhaw, dakbayan sa Sugbo niadtong Domingo sa kadlawon.
Si Deputy City Prosecutor Maria Theresa Casiño maoy nipahigayon sa inquest proceedings, alang sa mga kasong frustrated murder ug illegal possession of ammunition nga giatubang sa akusado.
Nisuway pa sa paghangyo ang kampo ni Lim nga dili una i-detain sa regular nga selda ang akusado, human nga nakadawat og ubay-ubay nga hulga sa iyang kinabuhi Lim, apan suma ni fiscal Casiño, mag-depende na kini sa Investigation and Detection Management Branch sa Cebu City Police Office (CCPO) nga maoy gitugyanan ni PRO-7 director P/CSupt. Noli Taliño, human kini mi-surrender ngadto kaniya.
Giangkon hinoon ni Lim nga iyang gipusil si Montalbo, apan igo lang siyang nanalipod sa iyang kaugaligon human sila nagkasinukmagay sa biktima ug duna pa kini laing kuyog nga modasdas unta ngadto kaniya.
Nasayran nga ang suspek, pag-umangkon sa negosyante nga si Peter Lim, kinsa una nang ginganlan ni presidente Rodrigo Duterte nga naapil sa iyang drug list.
Nabantayan usab atol sa pagdala kang Lim ngadto sa Cebu City Prosecutors Office, gikuyogan kini sa mga sakop sa Special Action Force (SAF).
Gipasalig hinoon ni Supt. Ryan Devares, hepe sa IDMB nga dili sila mohatag og special treatment ngadto kang Lim ug adto kini nila i-detain sa ilang regular nga selda uban sa lain pang mga piniriso.
Giklaro usab niini nga frustrated homicide ra unta ang kaso nga ilang isang-at, apan ang abogado sa biktima maoy nagbuot nga himoon kining frustrated murder ug wa usab sila mosang-at ug kasong illegal possession of firearms, tungod kay wa nila marekober ang armas nga gigamit ni Lim sa krimen.
Ang hepe usab sa CCPO nga si P/SrSupt. Joel Doria, nipasalig sa seguridad sa akusado, diin pabilin nga magbantay ang mga sakop sa SAF sa ilang headquarters alang niini.
Facebook Comments
