PNP Northern Mindanao, nagtala na og 45 ka mga election gun ban violators

Muabot na sa 45 ang natalang ihap sa mga nakalapas sa election gun ban sa tibuok Northern Mindanao.

Sumala ni PNP Northern Mindanao Spokesperson Police Lt. Col. Michelle Olaivar nga sa 45 nga natalang kalapasan, 45 sab ang natalang naaresto nga mga indibwal.

Samtang, muabot sa 42 ang mga armas nga nakumpiska sa mga otoridad ug 18 sab ang natalang nakumpiskang mahait nga hinagiban.

Matud ni Lt. Col Olaivar nga ang maong ihap gilangkuban sa usa ka natalang insidente sa Camiguin diin duha ang naaresto, pito ang natalang insidente sa Bukidnon diin walo ang nasikop.

Dugtong niini, siyam sab ang natalang insidente sa Misamis Oriental diin pito ang nasikop, 13 sab ang natala nga insidente sa Cagayan de Oro diin 12 ka tawo ang naaresto.

Nagtala sab og unom ka insidente sa Iligan City diin unom sab ang nasikop, pito ang natala sa Lanao del Norte ug walo ka tawo ang nasikop samtang duha ka insidente ang natala sa Misamis Occidental ug duha sab ang nasikop.