South Cotabato- Gipahimangduan sa Philippine Overseas Employment Administration (POEA) 12 ang tanang buot magtrabaho sa gawas nasud nga mag amping sa mga job hiring nga gina-post sa social media sama sa facebook ug mga transaksyon online.
Matud pa sa POEA 12 nga ang legal nga pagpangrecruit ginahimo sa usa ka lehitimong recruitment agency.
Kung sa social media gihimo ang transaksyon ug nagapangayo ug placement fee, kini klaro ug tataw nga usa ka matang sa modus operandi.
Giklaro usab sa maong buhatan nga wala ginatugotan ang direktang paghatag ug trabaho alang sa domestic helper.
Pahinumdom nalang sa agensya sa mga gusto motrabaho sa gawas sa nasud nga mag-amping sa mga illegal recruiter ug mamahimong maalamon sa pag-apply sa mga recruitment agency.
Mas maayo kung sutaon una sa buhatan sa POEA ang mga ahensya nga aplayan aron masigurong kini lehitimo.
Dili ikalilong nga daghan gyud ang mga nailad niining mga illegal recruiter mao nga dapat ang katawhan na mismo maoy mag-igmat aron nga dili mabiktima. (Khrystal L. Afliction)
