Davao City – Aduna gihapoy imuntar nga mga police assistance desk sa mga menteryo luyo sa pagsirado niini sulod sa usa ka semana sugod Oktubre 29, 2020 hangtud Nobyembre 4, 2020.
Sa interbyu sa DXDC RMN Davao kang Police Captain Rosario Aguilar, Spokesperson sa Davao City Police Office (DCPO), gibutyag niini nga aduna gihapoy mga personahe sa kapulisan ang ipakatag sa mga pampublikong sementeryo sa dakbayan.
Aduna gihapoy mga ‘exempted’ nga indibidwal nga makasulod sa menteryo kung magpahigayon og burial rites, birthday celebration sa mipanaw, ug pagkomemorar sa mitaliwan nga mahal sa kinabuhi panahon sa pagsirado niini.
“Allowed lang nga musulod kadtong mga exempted (individuals). Naa ‘tay police desk didto aron naa silay maadtoan kung naa silay query o mga pangutana,” segun ni Aguilar.
Hugot usab nga ipatuman ang health and safety protocols batok Coronavirus Disease 2019 (COVID-19) sama sa pag-check sa body temperature, pagsuot og face mask, pagbaton og social distancing, pagdili sa pagdala og backpacks ug pagsuot og jackets ug uban pang gidili sulod sa menteryo.
RadyoMaN Kirby Manzon
