Koronadal City–Hingpit na nga gikasuhan sa Koronadal City PNP ug kasong Parricide si Police Corporal Edwin Habagat kansa maoy gituohang mikulata sa iyang asawa nga si Davy Joy Habagat nga miresulta sa kamatayon niini gumikan sa bun-og nga naangkon niini sa iyang kalawasan.
Sumala pa ni Police Lieutenant Rey Sotelo, Imbestigador sa Koronadal PNP nga nagpahigayon ug hot pursuit operation ang hiniusang pwersa sa nagkadiyang unit sa kapulisan ilawom sa South Cotabato Police Provincial Office sa lungsod sa Banga, South Cotabato aron unta dakpon ang nasangpit nga Police.
Pag-abot sa lugar, boluntaryo matud pa niining gisubmitar ang iyang kaugalingon ngadto sa otoridad human sa duha ka adlaw nga pagtago-tago human gihimo matud pa ang pagkulata sa iyang asawa. Giangkon usab niini ang salaod nga iyang gihimo.
Nasayran nga temporaryong gidestino si Habagat sa Regional Personnel Holding And Accounting Unit sa Police Regional Office-12 sa Tambler Gensan tungod sa kaso niining gi-atubang.
Kahibaloan nga basi sa imbestigasyon sa kapulisan ang biktimang asawa ang gideklarang dead on arrival dihang gidala sa banang pulis sa ospital human kining nagreklamo sa panakit sa ulo ug pagkahilo niadtong Disyembre 12, tulo ka adlaw human kining gikaingong gikulata sa banang Pulis sa ilang panimalay sa Barangay Paraiso, Koronadal City. Sa karun anaa na sa kustodiya sa Koronadal PNP ang dinakpang pulis.
Samtang gikumperma ni Sotelo nga dili na mopasang-at pa ug kaso ang pamilya sa biktima ngadto na sa suspek apan tungod usa kini ka Police ug Heinous crime ang nakumitar niini, mismong ang kapulisan na maoy nagpasang-at ug kaso batok kaniya.(RV)
