Mas pinaigting ang pagpapatupad ng “Oplan Bandillo” at police presence sa Maples River sa Brgy. Pogonsili, Aguilar, kasabay ng pagdagsa ng mga turista ngayong Semana Santa. Sa isinagawang visitation at pakikipagdayalogo, direktang ipinaabot sa mga bisita ang mahahalagang alituntunin upang matiyak ang kanilang kaligtasan habang tinatamasa ang bakasyon.
Kabilang sa mga paalala ang mahigpit na pagsunod sa itinakdang oras ng operasyon mula umaga hanggang hapon, pag-iwas sa pagtalon o pag-dive sa mababaw na bahagi ng ilog, at patuloy na pagbabantay sa mga bata. Binigyang-diin din ang pagbabawal sa pag-inom ng alak, pagtakbo sa madudulas na bahagi, at pagkain sa gilid ng ilog upang maiwasan ang aksidente at mapanatili ang kaayusan.
Hinikayat din ang mga bisita na sundin ang mga tagubilin ng lifeguard, pangalagaan ang kanilang mga personal na gamit, at maging responsable sa pagtatapon ng basura. Sa pamamagitan ng mga paalalang ito, layunin ng aktibidad na mapanatili ang kalinisan, disiplina, at kaligtasan sa buong lugar.
Ipinapakita ng inisyatibong ito ang patuloy na pagsisikap na maiwasan ang anumang insidente at matiyak ang isang ligtas, maayos, at payapang pagbisita ng publiko sa Maples River ngayong Semana Santa. |𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
