Magapatuman sang pila ka inisyatibo ang Police Regional Office agud mapasiguro nga indi maduguon kag wala sang malapas nga tawhanon nga kinamatarung ang kampanya kontra illegal nga druga.
Ini may kaangtanan sa liwat nga pagbalik sa kapulisan sang giyera kontra druga nga gin-anunsyo sang damlag lang ni Presidente Rodrigo Duterte.
Kalakip sa inisyatibo amo ang paglakip sang mga pumuluyo sa pagpili sang mga magabug-os sa Drug enforcement unit pinaagi sa paghiwat sang survey sa kabarangayan kon sin-o ang mga pulis nga luyag sang mga pumuluyo nga mangin kabahin sang nasambit nga unit.
Kasunod sini, igapaidalum sa refresher course ang mga mapilian nga magabug-os sa drug enforcement unit natuhoy sa operational procedures, human rights, pag-uyat sang ebedensya kag husto nga proseso sang pagpasaka sang kaso, lakip na ang pagtuon sang mga provision sang R.A. 9165 kag spiritual enhancement.
Iga-revalidate man sang unit upod sa pdea ang mga personalidad nga yara sa ila drug watchlist kag ang katapusan amo ang pag-pangdakop sa mga personalidad nga may pending warrant of arrest angut sa illegal nga druga.
