General Santos City–Blangko pa karon ang Police Station 1 sa responsible nga mitulis sa duha ka mga estudyante nga silang Gerill Morales Bretanya, 20 anyos ug Kerr Dones Tumbagahan, 19 anyos pulos mga residenti sa Tieza Street, Barangay Dadiangas North ning syudad alas 11:00 ang takna sa gabie sa Tieza St. haduol sa Diagan Hospital.
Sumala pa ni Police Captain Abdulsalam Mamalinta Jr. ang hepe sa Police Station 1 nga sa karon ilaha pang ginasuta ang lugar kung asa nahitabo ang maong pagpanghold-up kung aduna bay nakamontar nga mga CCTV Camera aron nga masayran ang pamarog ug nawong sa mga suspect.
Ilaha matud pa nga ikumpara kini sa una na nga mga insidente sa pag panghold-up sa ilahang area aron nga masayran kung posible ba nga isa lang ang nagabuhat niini.
Samtang nagpahimangno man usab si Capt. Mamalinta ngadto sa mga tao nga naga uli ug dis oras sa gabie sa ilahang mga panimalay hilabi na kay Tuna Festival karon nga mamahimong kanunay nga mag mabinantayon sa palibot aron nga dili mabiktima sa sumang mga binuhatan ug kung adunay samang mga panghitabo gilayon kini nga isumbong sa pinakaduol nga Police Station. (Dave Silagan)
