General Santos City–Aduna na matud pay ginasundan nga person of interest karon ang Police Station 3 kabahin na sa responsible sa paglabay sa creek ug suway ug patay sa 15 anyos nga dalaga nga si alyas cherry nga nanimuyo sa Barangay Labangal ning syudad.
Sumala pa ni Police Lieutenant Felix Minion III ang officer in charge sa Police Station 3 nga human na identify sa inahan sa bata ang biktima gilayun nilang gi suta kung kinsa ang ulahing naka uban sa biktima ug migula ang pipila ka mga pangalan.
Ilaha matud pang gihinabi ang ulahing nakauban sa biktima ug didto gikabutyag matud pa niini kung asa sila nahidangat sa nahisgutang si alyas Cherry ayha sila nag kabulag ug nakita ang biktima sa irrigation sa Barangay Baluan.
Sumala sa kauban sa biktima nga human sa ilahang paglaag, niadto pa sila sa Kulasi, Barangay Labangal aron nga mag-inom. Human niini nanguli na matud pa sila kung asa ninaug ang biktima sa kanto haduol sa ilahang balay ug posibleng sa maong lugar gikuha sa suspect ang biktima nga anaa na sa impluwensya sa ilimnong makahubog ug didto gipanamastamasan ug gisuwayan ug patay.
Sa kasamtangan nagpabilin pang anaa sa talandugonong kahimtang ang biktima sulod sa ICU sa Dr. Jorge Royeca Hospital.(Dave Silagan)
