General Santos City–Padayon ang ginahimong imbistigasyon karon sa Police Station 3, sa kamatayon sa usa ka Raymond Buenaventura Rivera, 41 anyos usa ka computer technician ug nanimuyo sa Yumang Street, Barangay Lagao ning syudad human nga gipusil patay kini sa wala mailhing suspect sulod mismo sa iyahang panimalay niadtong milabay nga adlaw.
Sumala pa ni Police Major Benhur Catcatan , ang hepe sa police station 3, nga sa karon blangko pa sila sa motibo sa maong pagpamusil ug wala pa usab silay mga person of interest nga posibleng mipusil sa biktima.
Una nang gikumperma ni Major Catcatan nga biktima ang kanhi na nga napreso tungod sa iligal nga droga ug dihang nakagawas sa prisohan nag trabaho nalang isip computer technician.
Sa karon nagpahigayon na ug makuting imbistigasyon ang kapulisan kalabutan sa maong insidenti aron nga mailhan ang suspetsadong mihimo sa krimen.(Dave Silagan)
