General Santos City–Aduna nay ginasundan karon nga person of interest ang Police Station 4 kabahin na sa pagpamusil patay sa wala mailhing responsible sa usa ka barangay tanod nga nailang si Ramon Brotarlo Jr. 48 anyos nga nanimuyo sa Soledad State, Barangay City Heights ning syudad alas 7:00 pasado ang takna sa gabie didto mismo sa Sebastian st. Paradise Subdivision sa susamang barangay.
Sumala pa ni PSI Dulawan ang hepe sa Police Station 4 nga basi sa ilang nahimong imbistigasyon personal grudge ang nag-unang motibo nga ilang ginasundan karon kabahin na sa maong pagpamusil apan iyang gipaklaro nga aduna usab silay ubang angulo nga ginasuta aron nga masayran gayud ang tinuod nga hinungdan nganong gi pusil ang nasangpit nga biktima.
Dugang pa niini nga ayha matud pa napusilan ang biktima nahisgutan pa niini sa iyang ka live-in ug mga kabanay nga aduna kiniy nakalalis sa iyang usa ka trabaho nga construction.
Kung kahinumduman nga nagalakaw ang biktima sa maong lugar ug padulong na unta sa barangay hall aron nga magduty sa dihang gihunungan lang kinig kalit sa usa ka motorsiklo nga dunay sakay duha katao ug didto gipusil sa makadaghan nga higayon sa iyang ulo nga miresulta sa iyang hinanaling kamatayon. (Dave Silagan)
