General Santos City— Gidayeg sa mga konsehal ang Police Station 7 human ang paspas nga pagsulbad sa kaso sa 8 anyos nga si Mary Agustin nga una ng gipatay ug gilugos.
Atol sa gipahigayong committee hearing kagahapong adlawa, Nobyembre 21, gibutyag ni City Councilor Atty. Ramon Melliza nga usa ka pinasaheng lakang ang gihimo sa maong Police Sation sa pagpanguna ni Police Senior Inspector Fernando Manuel Jr., hepe sa Police Station 7 human nga mag-imbita ug pastor aron nga mapa-angkon ang suspek nga si Mark Engkong, 22 anyos, lumad nga taga Malapatan, Sarangani Province sa krimen nga iyahang gihimo nga miresulta paghimo ug Extra Judicial Confession.
Samtang gibutyag ni City Councilor Atty. Jose Edmar Yumang, chairman sa blue ribbon committee nga sa sunod regular session, Nobyembre 28, nakatakda silang maghatag ug pasidungog ngadto na sa Police Station 7 sa pagpanguna sa ilahang hepe uban ang presensya sa kabanay sa biktima pinaagi sa usa ka resolusyon.
Pagpaklaro ni Kagawad Yumang nga kagahapon pa unta ihatag ang maong pasidungog apan tungod wala ang presensya sa kapulisan ug ginikanan sa biktima, kini gisibog sunod semana.
Tumong niini aron sa paghatag ug pagdayeg sa paspas nilang pagsikop sa suspek ingon man paghatag ug hustisya ngadto na sa biktima ug isip pagpasalamat na usab ngadto sa tropa sa kapulisan.
