General Santos City— Gipasidunggan sa hawanan sa konsedo ang kapulisan sakop sa Police Station 7 sa pagpanguna ni Police Senior Inspector Fernando Manuel Jr.
Ang maong pasidunggog ang may kalabutan sa paspas nga pagsikop sa suspek nga si Mark Engkong, 22 anyos nga suspek sa paglugos ug pagpatay sa 8 anyos nga Mary Agustin nga taga 39.2, Brgy. Fatima, ning dakbayan.
Personal nga gidawat ni Police Inspector Vladimir Togonon, Deputy Chief Of Police sa Police Station 7 ang maong pasidunggog kung asa halos tanang personahe niini ang gihatagan ug certificate.
Sumala kang Inspector Togonon nga igo lang nilang gihimo ang ilahang trabaho gumikan lakip sa ilahang mandato nga dakpon ug pasakaan ug kaso ang kinsa mang makalapas sa balaud.
Wala matud pa sila magdahum nga usa kini sa mga hinungdan nga sila ilhon sa mga opisyal sa syudad sa paspas nga paghatag ug hustisya sa biktima pinaagi sa pagsikop sa suspek.
Dako man usab ang iyahang pagpasalamat sa mga force multipliers sa ilahang area of responsibility nga kanunay nga nagatabang kanila pinaagi sa paghatag ug impormasyon.
Nanawagan man usab siya sa katawhan ilawom sa ilahang area nga gilayong ipaabot kanila ang tanang mga nagakahitabo sa palibot aron nga mahatagan ug aksyon sa kapulisan.
