General Santos City—Mitabang na ang Tinagacan PNP ngadto sa Alabel PNP sa pag imbistiga sa nahitabong kamatayon sa minor de edad nga si Maria Teresa Perez, 16 anyos, estudyante ug residenti sa Barangay Batomelong, Gensan kansa una nang nakaplagang patay sa sapa nga sakop sa Barangay Domoloc, Alabel niadtong Domingo.
Matud ni Police Captain Robert Fores, Hepe sa Tinagacan PNP nga ang Alabel PNP maoy nag imbistiga sa kaso gumikan sakop man sa ilang AOR ang lugar hain nakaplagan ang patayng lawas sa biktima kansa gituohang gilugos.
Samtang gibutyag pa ni Fores nga basi sa ilang kaugalingong pagsuta sa lugar, ayha namatay ang biktima nakasulti nang daan ang nasampit sa iyang amahan nga aduna matud pay lalaking nakataptap ug nawong nga mura ug nagsunod-sunod kaniy apan iya lang kining gibaliwala.
Dugang pa ni Captain Robert Fores nga nakit-an sa lawas sa biktima ang mga bun-og ingon man samad sa iyang agtang ug sa iyang baba nga bahin timailhan nga gihapak o naigo sa gahing butang.
Samtang base usab sa gihimong pagsuta sa Tinagacan PNP adunay nakit-an nga lugar sa may Barangay Domolok, Alabel nga nakitaan ug mga buhok sa babaye kansa gituohang iyaha sa biktima. ang maong lugar ang duol lang sa sapa.
Human sa insidenti, nanawagan si Captain Robert Fores sa tanang mga katawhan sa may Domolok o dili ba kaha sa Barangay Tinagacan nga nakakita sa lalaking gikaingon sa biktima ang isumbong lang sa ilang buhatan o dili ba kaha sa Alabel PNP aron nga maimbistigahan.
