Davao City – Taliwala sa gipatumang mga safety and health protocols sa dakbayan sa Davao nunot sa pandemic nga nasinatian sa katawhan karong tuiga, mas gipakusgan pa sa Davao City Police Office (DCPO) ang kampanya batok sa illegal drugs ug padayon ang paglusad ug buy-bust operations sa ilang mga AOR.
Sa report gikan sa DCPO sa mga dagkong panghitabo niadtong 2020, usa dinhi mao kadtong big-time drug pusher nailang si Bembol Papata, taga-Visayan Village, Tagum City kinsa nadakpan sa Sta. Ana PNP sa gikasang joint buy-bust operation diin siya nakuhaan og dul-an P10 milyon nga kantidad sa shabu sa dihang naharang sa Sirawan Toril Task Force checkpoint ang usa ka Earl Cesar Camiso, taga Nabunturan Davao De Oro.
Nasakmit sa mga awtoridad ang kantidad 3.6 milyon nga shabu, usab narekober ang usa ka .38 caliber revolver ug mga bala, 24 ka dagko nga paketeng shabu nga mukantidad P1.8 milyon nga gisagol sa pancit canton ang nakumpiska sa mga personahe sa Maa Davao City Jail nga gihatod sa duha ka miyembro sa nagpailang usa ka relihiyosong grupo.
Ang mga dinakpan giilang sila Doroteo Guibernas, Jr. 63 anyos, taga Roldan Village Maa ug Mylene Tamondong, 34 anyos, taga Brgy.Alambre Toril ning dakbayan.
Sikop usab sa buy-bust operation sa Bunawan PNP si Ray Jhon Fernando kinsa nakuhaan og P1.3 milyon kantidad sa shabu nga nakumpiska sa mga awtoridad sa Davao International Airport.
Lain pang kalampusan mao ang pagsakmit sa unom ka karton nga dunay sulod nga agar wood mukantidad og kapin P60 milyon nga ipadala unta sa laing nasud.
Samtang laing duha ka tawo ang gipamusil-patay sa may Brgy.Matina Crossing sa wala pa mailhing suspek .
Ang biktima mao sila Susana Villaceran., 60 anyos, negosyante ug Ceswen Umacob, 30 anyos, parehong residente sa Union Village, Mankilam,Tagum City.
Sa imbestigasyon sa kapulisan, ninggula nga ang motibo sa pagpusil may kalambigitan kini sa iyang negosyo ug bangi sa yuta.
Sumala ni Police Captain Rosario Aguilar, DCPO Spokesperson, mapasalamaton siya sa koordinasyon sa tanang Dabawenyo nga kanunay misuporta sa kapulisan ug nituman sa tanang mga health protocols tungod ug alang sa kaluwasan natong tanan.
Gipaabot usab ni Aguilar ngadto sa tanang katawhan nga sa pagselebrar sa Bag-ong Tuig, sigurohon gayud nga ang matag usa ka pamilya anaa sa sulod sa panimalay og nga ang tanang miembro sa banay luwas gikan sa mga dautan.
RadyoMan Don Pulayao
