*General santos city— Gipaklaro ni Police Col. Aden Lagradante, City Director sa Gensan City Police Office nga dunay ginahimo mga lakang ang kapulisan aron mahatagan ug pagtagad ang kaso sa patay sa dakbayan.*
*Iyaha na matud pang gihatagan ug direktiba ang tanang police station hilabina ang mga station nga adunay daghang kaso sa krimen nga mas palawman ang ginahimong imbestigasyon alang sa mas daling pagresolba sa krimen.*
*Pagpaklaro niya nga atol sa gihimong command conference sa Gensan City Police Office, iyaha ng gimanduan ang mga Chief Of Police nga i-maximize ang ilahang pwersa hilabina sa mga lugar nga posibleng mahitabuan sa krimen.*
*Pag-angkon ni Col. Lagradante nga sa karon, wala na gyu’y ginapili nga oras ang mga kriminal gumikan bisan hayag, adunay patay nga magakahitabo.*
*Pamahayag niya nga pulis ra usab ang ginabantayan sa mga kriminal gumikan kung anaa ang presensya sa otoridad, walay krimen nga mahitabo. Saysay niya nga usa sa mga hagit kanila mao ang kalapad sa Gensan nga dili tanang lgar mabutangan nila ug personahe, apan nagahimo sila ug pamaagi.*
*Dugang pamahayag ni col. Lagradante nga hugot ang mando ni Gensan City Mayor Ronnel Rivera ngadto kanila nga kinahanglang maghimo ug lakang sa mga krimen sa dakbayan.*
