Dipolog City – Gibalhog karon sa prisohan sa Dipolog City Police Station ang usa ka police officer human gireklamo og rape sa usa ka 19 anyos nga dalaga diin sumala pa natigayong pagpanglugos didto sulod sa Averde Inn nga nahimotang sa Barangay Sta. Felomina, dakbayan sa Dipolog, bandang alas 12:55 ang takna sa tungang gabii.
Base sa report sa buhatan sa kapolisan ang nadakpang suspek mao si Police Officer 1 Nick Arthur Rebecca, 31 anyos, ulitawo, usa ka PNP member nga nakaasign sa PHSG, Zamboanga del Norte Provincial Police Office ug lumuloyo ning dakbayan.
Sa pakighinabi sa rmn new team ngadto kang PSI Evelyn Porras, ang chief sa Women and Children’s Protection Desk sa Dipolog PNP, nibutyag nga ang maong biktima, kaila lang sa maong polis diin nagkitaay niadtong higayona apan gidala matod pa sa suspek sa room 16 sa maong inn ug didto na nahitabo ang pagpanglugos.
Dugang pa ang biktima aduna kini uyab nga maoy iyang gisumbongan human siya matod pa gilugos sa nahisgotang police officer.
Ang uyab na mismo sa biktima maoy nangayo ug tabang sa buhatan sa kapolisan nga gidayong nilang girespondehan.
Sigun ni PSI Porras base sa record sa admin sa Provincial PNP nag-awol o absent without official leave ang status sa maong Police Officer diin sa karon gawas sa kasong rape magatubang sab kini sa administratibo.
Samtang gikuhaan sab ug pahayag sa rmn news team ang nadakpan police officer sulod sa prisohan, didto gipangulipas niini ang pasangil nga dunay lugos og gibutyag nga frame-up ang hitabo.
